Kókoskjúklingur með sætkartöflusalati

Þessi réttur er svo rosalega góður að eiginmaðurinn segir hann klárlega tróna í efsta sæti yfir bestu kjúklingarétti EVER! Sætu kartöflurnar passa líka einstaklega vel með honum og engin sósa nauðsynleg með þessum dásemdum. Frábær réttur til að bera fram í matarboði og mun án efa slá í gegn! Ég gerði líka með þessu venjulegar kartöflur því börnin eru ekkert sérstaklega hrifin af sætu kartöflunum. Og það besta er að þetta er hollt og gott :)


Rétturinn er fyrir ca. 4

1 heill kjúklingur
3 msk. kókosmjöl
3 msk. saxaðar möndlur
1 msk. fiskisósa
1/2 dl. ólífuolía
3 msk. sítrónusafi
handfylli ferskt kóriander, saxað
2 msk. gott fljótandi hunang
1 tsk. turmerik
2 hvítlauksrif, kramin eða rifin
salt og pipar

Byrjið á því að klippa hrygginn úr kjúklingnum þannig að hann fletjist auðveldlega út. 

Blandið öllu saman sem á að fara í marineringuna og smyrjið því á kjúklinginn.

Leyfið þessu að marinerast í a.m.k. klukkustund. Hitið ofninn í 180° og eldið neðarlega í 40-50 mínútur eða þangað til kjúklingurinn er safaríkur og algjörlega tilbúinn. Ef ykkur finnst hann vera farinn að brúnast of mikið er ekkert mál að skella smá álpappír eða loki yfir hann. Ég mæli með því að skafa alla marineringuna sem verður eftir í botninum, þið viljið ekki missa af neinu af góðgætinu!

Sætkartöflusalat
1 stór sæt kartafla
2 cm. bútur af blaðlauk, smátt saxaðir
3 msk. rúsínur
50 gr. pecan hnetur
lítil handfylli söxuð steinselja
lítil handfylli saxað kóriander
1 lítið þurrkað chilli, mulið í mortéli

Sósan
4 msk. ólífuolía
2 msk. gott fljótandi hunang
1 msk. balsamik edik
1 msk. sítrónusafi
2 msk. appelsínusafi
2 cm. bútur af engifer, fínt rifið
1/2 tsk. kanill
pínu salt

Skerið sætu kartöflurnar í ca. munnbita og setjið á ofnplötu með ólífuolíu, salti og pipar. Bakið við 180° í 30 mínútur. Blandið öllu sem á að fara í sósuna og hellið henni yfir kartöflurnar þegar þær koma blússandi heitar út úr ofninum. Bætið hinu hráefninu saman við og berið fram volgt.

Fyrir krakkagormana sem eru ekki mikið fyrir sætar kartöfur þá gerði ég afar einfaldar kartöflur sem "amma London" gerir stundum fyrir þau og þau borða alltaf vel af þeim. Þið einfaldlega sjóðið kartöflur, setjið í skál og á meðan þær eru ennþá heitar þá setjið þið smávegis af íslensku smjöri og saxaðri mintu yfir. Tilbúið!

Hreindýrabollur

Við hjónin keyptum slatta af dásamlegu hreindýrakjöti og þar á meðal fallegasta hakk sem ég hef séð! Algjörlega fitusnautt, lífrænt, "free range", grasbítandi, frábært kjöt! Ekki hægt að fá það betra! Fyrsta máltíðin sem matreidd var voru hreindýrabollur. Meðlætið var svo bara einfalt, sæt kartöflumús, sósa og sulta. Ekkert grænmeti sem skyggði á bollurnar góðu! Því miður náðist ekki að mynda bollurnar... þær runnu allt of hratt niður hjá okkur.... Það kemur vonandi ekki að sök.

Uppskriftin er fyrir 4-6

800 gr. Hreindýrahakk
1 dl. mjólk
2 egg
6 msk. brauðrasp
5 einiber, kramin í mortéli
nokkrar greinar af timjan
1 grein af rósmarín
2 msk. Teryaki sósa
salt og pipar
smjör og olía til steikingar

Setjið kjötið í skál, blandið öllu saman við og kryddið með salti og pipar. Passið bara saltið því Teryaki sósan er sölt. Ef blandan er of blaut setjið þið meiri rasp en ef það er of þurrt þá setjið þið mjólk. Ef ekki er til Teryaki sósa má auðveldlega skipta henni út fyrir soya sósu eða tamarind sósu. Þær gera allar svipað bragð. Ég bý til bollur á stærð við borðtenniskúlur en hver og einn gerir bara eins stórar og hann vill. Brúnið bollurnar upp úr blöndu af smjöri og olíu. Olíuna set ég til að smjörið brenni síður og geri það alltaf þegar ég steiki upp úr smjöri. Þegar bollurnar hafa brúnast takið þær af og setjið inn í 180° ofn í 10 mínútur eða þar til bollurnar hafa eldast alveg í gegn.

Sósan
Hellið sjóðandi vatni (ca. hálfum lítra) á pönnuna sem bollurnar voru steiktar á til að fá allan kraftinn úr þeim. Setjið nauta- eða villikraft út í, eina matskeið af rifsberjasultu og eina matskeið af smjöri út í og leyfið að malla stutta stund. Smakkið til með kraftinum og sultunni. Mér finnst gott að hafa hana svolítið sæta. Þykkið með maizena mjöli eða þeim sósujafnara sem þið viljið.

Með þessu bara ég svo fram kartöflumús sem er afar einföld. Sjóðið sætar kartöflur, stappið með smjöri, pipar og kanil. Tilbúið! Og svo varð að vera smá rifsberjasulta líka.

Þið megið svo  bíða spennt eftir fleiri hreindýrauppskriftum, nóg er af því í frystinum :)

Sumarlegur og sætur eftirréttur

Jæja, er ekki komið gott af sumarfríi og tími á eina uppskrift?

Búið að týna hvert einasta ber á þessum trjám!

Við fjölskyldan fórum í smá göngu upp Esjuna í dag og kíktum í leiðinni upp að Mógilsá og týndum nokkur hindber. Því verður ekki lýst með orðum hversu góð nýtýnt íslensk hindber eru... þið verðið bara að prófa sjálf!

Fallegt!

Mér finnst eftirréttir sem hver og einn fær á diski eða í skál vera frábærir. Allir fá sinn eftirrétt, fallega skreyttan og tilbúinn bara fyrir hann. Ég henti í einn ótrúlega einfaldan eftirrétt sem rann ljúflega niður hjá öllum heimilismeðlimum með tilheyrandi smjatti og kjamsi :) Það má að sjálfsögðu nota aðra ávexti, t.d. jarðarber, passion fruit eða granatepli eða blöndu af góðum ferskum ávöxtum. Hversu gott væri nú að nota fersku íslensku bláberin sem allir eru brjálaðir í að týna þessa dagana???

Sumarlegur og sætur eftirréttur

Uppskriftin er fyrir 4

Marengs

2 eggjahvítur
100 gr. sykur

Hitið ofninn í 100°. Þeytið eggin og bætið sykri út í smátt og smátt. Útbúið átta jafnar litlar doppur, ca. matskeið hver kaka á bökunarplötu. Bakið í ofninum í klukkutíma. Slökkvið á ofninum og látið standa í honum í smá stund í viðbót.

Fylling

1 peli rjómi
2 dl. fersk hindber
1 msk. flórsykur

Þeytið rjómann og stráið flórsykrinum saman við. Stappið berin og blandið saman við. Setjið 4 litlar kökur á diska, 1 á hvern disk. Skiptið berjarjómanum jafnt á kökurnar og setjið hinar 4 kökurnar ofan á og myndið þannig sætar samlokur. Skreytið með ferskum berjum og fallegum mintulaufum.  Gott er að láta kökurnar standa í kæli í hálftíma til klukkutíma. Ótrúlega einfalt og dásamlega gott!

Tilbreyting: sumir eru ekki hrifnir af rjóma eða af einhverjum ástæðum vilja nota eitthvað annað. Þá er tilvalið að nota gríska jógúrt í staðinn fyrir rjómann eða blanda jógúrt/sýrðum rjóma saman við rjómann. Þá verður rétturinn aðeins léttari.

Blóðberg

Sumarið er tíminn! Tíminn til að tína þessa dásamlegu jurt sem Blóðbergið er.

Lilja Bríet hefur staðið sig vel í Blóðbergstínslu

Fyrir utan bragðkostina er heilsufarslegur ávinningur Blóðbergsins ótrúlega mikill. Blóðberg er hægt að nota í matargerð og augljóst mál að nota það með íslenska villta lambakjötinu sem nú þegar hefur örugglega gætt sér á því á fjallaferðum sínum. Blóðberg og fiskur, sérstaklega villtur vatnafiskur er fullkomið par og passar það líka vel með kjúklingi. Hvernig væri ef hvítlaukur myndi bjóða Blóðbergi upp í dans? Algjörlega frábært danspar :)
Einfalt er jú auðvitað að útbúa te/seiði úr jurtinni og bæði fullorðnir og börn vilja gæða sér á því í sumarbústaðnum eða útilegu :) Til að bæta enn hollustuna væri tilvalið að sæta það með ögn af Manuka hunangi sem er frábært t.d. fyrir þá sem þjást af frjókornaofnæmi.

Manuka hunang fæst í heilsuverslunum

Blóðbergið er frábært við kvefi og slími í öndunarfærum og bæði hægt að drekka það eða anda að sér heitri gufunni. Það er gott við meltingarfærasjúkdómum og bólgum í meltingarfærum. Það er hægt að nota það í bakstra til að lina verki í liðum og vöðvum eða útbúa úr því olíu til að nota í baðið. Kostir þessarar frábæru jurtar sem vex villt út um allt land eru óteljandi og frábært að virkja alla fjölskylduna í það að tína út um mela og móa.... :) Lítið mál er að þurrka jurtina og geyma allan veturinn. Allir út að tína Blóðberg!!!

Beikon- og kryddjurtafylltur kjúklingur

Það er svo gaman þegar kryddjurtirnar spretta upp á svölunum því þá get ég gert allan mat svo góðan! Og að taka eitthvað svo einfalt eins og kjúkling og fylla hann með bragðmiklum jurtum og beikoni og lauma smá smjöri með.... það er auðvitað uppskrift að einhverju dásamlegu! Þetta er frábært til að bjóða gestum upp á, einn stór kjúklingur dugar fyrir 3-4 ef meðlætið er gott og nóg af því.

Uppskriftin er fyrir 3-4 (fer eftir stærð fuglsins)

1 kjúklingur
1 sítróna
2-3 hvítlauksrif
2 msk. mjúkt smjör
5-6 sneiðar beikon
handfylli af kryddjurtum að eigin vali, ég notaði timian og rósmarín, basil og steinselja virka líka vel
salt og pipar
ólífuolía

Hitið ofninn í 200°. Losið skinnið frá bringunni á fuglinum og reynið að losa meðfram hliðunum líka án þess að rífa skinnið. Rífið börkinn af sítrónunni og kreistið safann í skál. Kremjið eða saxið hvítlaukinn smátt og blandið saman við. Bætið smjöri, söxuðu beikoninu og kryddjurtunum saman við. Kryddið með örlitlu salti og pipar.

Laumið fyllingunni undir skinnið og setjið sítrónubátana inn í kjúklinginn. Setjið smá ólífuolíu utan á fuglinn og kryddið með salti og pipar.

Eldið í ofni í rúma klukkustund, tíminn fer auðvitað eftir stærðinni á fuglinum, fyrst með loki yfir og síðustu 10-15 mínúturnar með engu loki til að fá fallega skorpu. Það er líka rosa sniðugt að ausa öðru hvoru bráðnu smjörinu yfir fuglinn.

Með þessu þarf svo að vera gott meðlæti, ekki satt? Það er svo auðvelt að henda kartöflum/sætum kartöflum/gulrótum og öðru rótargrænmeti á fat og krydda vel og vandlega og baka í ofninum! Þetta er ein af þeim útgáfum sem okkur finnst rosalega góð.

Rótargrænmeti að vild, í þetta sinn notaði ég kartöflur og sætar kartöflur sem fyllti eitt gott ofnfat
2 góð eða 3 lítil hvítlauksrif
2 stilkar rósmarín
ólífuolía
salt

Saxið grænmetið í ca. munnbita og raðið í ofnskúffu. Ef þið eigið mortél þá er rosalega sniðugt að nota það í svona vinnu. Skellið þá hvítlauknum í mortélið, smá salti og nálunum af rósmaríninu. Berjið út þessu allt líf og blandið ólífuolíu saman  við þar til þetta lítur út eins og kryddolía.

Litli hjálparkokkurinn minn 

Hellið yfir kartöflurnar og nuddið vel og vandlega yfir þær allar.

Bakið ofarlega í ofninum í ca. háltíma, snúið þeim aðeins eftir 20 mínútur. Við viljum að þær brúnist aðeins og séu næstum því brenndar, allavega sætu kartöflurnar :)

Sósan!

Það þarf góða sósu með svona mat! Og hvað er betra en villisvepparjómasósa? En villisveppir eru svo dýrir.... :( Ég luma á smá ráði til að nota villisveppina þannig að það þurfi minna af sveppum en fá samt heilmikið bragð úr þeim. Hérna kemur mortélið aftur sterkt inn en það er auðvitað hægt að gera þetta í matvinnsluvél, kaffikvörn eða bara með gamla góða kökukeflinu. Það er bara svo gaman að nota mortélið :)

2 msk. þurrkaðir villisveppir
1/2 laukur
1/2 askja venjulegir sveppir
1/2 lítri rjómi eða matreiðslurjómi
1 dl. sjóðandi vatn
1 góð msk. mjúkur ostur (má vera hreinn rjómaostur, gráðaostur, camembert.... bara það sem þið viljið)
1 kjúklingateningur (má líka vera sveppateningur)
smjör til steikinga
Myljið villisveppina í duft í mortéli, hellið sjóðandi vatni yfir og látið standa í smá stund. Saxið laukinn og venjulegu sveppina og steikið upp úr íslensku smjöri. Hellið villisveppasoðinu (muldu sveppina og vatnið) og bætið ostinum út í. Rjóminn og teningurinn fer út í þegar osturinn hefur bráðnað. Látið þetta svo bara malla í svolítinn tíma. Smakkið til með salti og pipar. Ef það þarf að þykkja sósuna þá nota ég alltaf maisena mjöl en það má nota hvaða þykki sem er.


Svo er bara að bera þetta á borð, kannski smá salat á kantinn og hvítt í glas?

Litli tómaturinn

Eldabuskan horfir dreymin á pííínulitla tómatinn sem er að byrja vaxtaskeið sitt á trénu í stofunni og hugsar "hvað get ég gert úr þér?"

Kartöflusalat

Við notum ekki mikið af kartöflum á heimilinu en þegar við gerum það þá er ekki í boði að sjóða og hafa þetta eitthvað einfalt og "leiðinlegt" því ekki eru allir heimilismeðlimir jafn hrifnir af því..... Í kvöld grillaði ég lambabóg sem ég hafði marinerað í ólífuolíu, hvítlauk, rósmarín, timian, sítrónusafa og svörtum pipar. Það hentaði því afar vel að hafa gott kalt kartöflusalat með þessu. Í raun er það þannig að þegar maður eldar lambabóg þá eldar maður hann frekar lengur en skemur, hann er afar safaríkur og því er alveg nóg að hafa bara gott kartöflusalat með, sósan er í raun óþörf en ég gerði samt smá villisveppasósu.... bara af því að ég var í stuði og af því að það er sunnudagur :)
En salatið góða er aðalatriðið í þessu löngu tímabæra bloggi mínu. Ég er ekki mjög hrifin af mæjónesi.... ekki nema með því sé hvítt brauð og rækjur... og fermingarbarn í sama herbergi ;) Mæjónes á ekki heima í kartöflusalati heldur eingöngu í fagurlega skreyttum brauðtertum í fermingarveislum! Ég kýs að gera mín kartöflusalöt meira spennandi. Einfaldasta útgáfan og það sem sniðugt er að gera þegar glænýtt smælkið er stungið upp síðsumars er að setja smá smjörklípu hér og þar yfir heitar kartöflurnar svo það bráðni, smá Maldon eða Himalaya salt og ferska mintu... Nammi nammi namm! Í þetta sinn fór ég svolítið suðræna leið, innblásinn af risastóru basil plöntunni í stofuglugganum sem gargaði á mig að snyrta sig!

Uppskriftin er fyrir 4 en mjög auðvelt að breyta hlutföllum án þess að bragðið klikki.

Kartöflur, u.þ.b. 150 gr. á mann
4-5 msk. GÓÐ ólífuolía, t.d. þessi
2-3 msk. balsamik edik
2-3 msk. fljótandi hunang eða hlynsíróp
ögn af ferskum söxuðum chilli (má sleppa)
1/2 rauð paprika skorin í þunna strimla
nokkrir sólþurrkaðir tómatar smátt saxaðir
handfylli af fersku basil, smátt saxað
Salt og pipar

Kartöflur skornar í hæfilega stóra bita og soðnar í söltu vatni þar til mjúkar. Öllu sem á að fara í dressinguna blandað saman og kartöflurnar settar síðastar út í þegar þær hafa kólnað smá stund. Smakkað til með salti eða hunangi/sírópi. Trikkið er að finna rétta jafnvægið milli salta bragðins, súra (edikið) og sæta úr hunanginu/sírópinu. Borið fram með öllum grillmat, lambalæri eða einhverju slíku.
Með svona salati er líka hægt að vera frumlegur og bæta og breyta. Ég set stundum nokkrar saxaðar grænar ólífur eða smá capers ef ég á það til. Það frískar þetta aðeins upp og gerir salatið bara betra.